23
10.2019

台灣珍珠奶茶手信開箱文

飲食烹飪   環球旅遊   台灣館(飲食)  

身為一個珍珠奶茶嘅粉絲,去到台灣但又冇辦法將台灣地道嘅珍珠奶茶帶返嚟,所以只好買咗一堆同珍珠奶茶相關嘅產品返嚟XDD,等我開心share吓今次去台灣買咗/食咗嘅珍珠奶茶商品啦!

 

1. 珍珠奶茶牛軋糖

佢哋嘅牛軋糖除咗大家都熟悉嘅杏仁味之外,仲加入咗「珍珠奶茶軟糖」代替一般嘅珍珠,睇側面就可以同時睇到杏仁同埋珍珠奶茶軟糖,牛軋糖仲要係睇到已經令人流哂口水嘅奶茶色!

食嘅時候可以品嚐到香濃嘅奶茶香,仲會食到一粒粒珍珠嘅感覺,同時亦不失煙韌口感。不過同杏仁相比,口感上都係杏仁略勝一籌,因為杏仁嘅酥脆感同牛軋糖本來嘅軟綿綿更加有「衝突感」!不過,呢款真係有好濃郁嘅奶茶香味嘅!

 

2. 珍珠奶茶風味酥

打開包裝嘅時候就已經可以聞到一陣奶茶香,佢個樣同鳳梨酥差唔多,初初睇落以為係紅豆餡,但如果仔細一聞就會聞到濃郁嘅奶茶香氣!

睇橫切面嘅時候,一時間係無辦法搵到珍珠嘅蹤影,搞到我都有啲懷疑自己係咪買錯咗~但係一食落口就發現到煙煙韌韌嘅珍珠,香軟嘅奶茶餡搭配有咬口嘅珍珠,呈現出同珍珠奶茶完全唔同嘅風貌,餅皮都好香,完全係保留咗鳳梨酥嘅特色之餘,又可以突出到珠珍奶茶嘅獨特新口味!

呢款特別推薦畀中意食台灣鳳梨酥嘅粉絲們,厚實香酥嘅奶茶餅皮搭配上口感煙韌嘅珍珠餡,完全可以品嚐到台灣獨特嘅珍珠奶茶文化,無論係送禮定係自己食都一流!

 

3. 珍珠牛奶糖

呢款係喺牛奶糖入面加咗珍珠,雖然無奶茶味,但為咗珍珠我都有買嚟試吓XDD,令人驚喜嘅係珍珠嘅口感十足,除咗牛奶糖本身嘅咬口之外,仲可以感受到咬珍珠嘅感覺。

不過牛奶糖本身就已經好甜,再加埋珍珠軟糖真係甜上加甜,但如果你係鍾意甜,呢款產品就強烈推介畀鍾意食甜嘢嘅各位啦!

 

4. 珍珠奶茶麻糬

睇包裝時以為係大福咁上下大,但打開之後就發現原來係一個個小包裝,方便食用。就咁睇外型好似一般麻糬咁軟腍腍,咬開之後就可以睇到奶茶餡同埋中間包住嘅珍珠。

入面嘅珍珠比較腍,同麻糬嘅口感相似,食食吓啲珍珠會喺口入面融化,口腔充斥住黑糖嘅香氣,呢款都幾甜,好適合下晝搭配一杯茶慢慢嘆~

5. 珍珠奶茶朱古力

用奶茶味朱古力包住煙韌嘅珍珠軟糖,食落就好似真嘅珍珠一樣,一撕開包裝就可以聞到好濃嘅奶茶味,外層嘅奶茶朱古力帶有茶香,而中間嘅珍珠就以黑糖口味嘅軟糖代替,係非常有咬口嘅。

珍珠奶茶同朱古力呢個組合簡直係甜食嘅最佳配搭,得閒拎嚟過吓口癮都唔錯!

 

6. 珍珠奶茶雪條

雪條係同黑糖珍珠鮮奶嘅味道係一樣,入面有一粒粒嘅珍珠,冰涼嘅口感非常獨特!

最神奇嘅係,一般珍珠如果雪太耐都會變到石頭咁硬,但呢款雪糕入面嘅珍珠一啲都唔硬,仲有啲偏腍,少咗啲煙韌嘅感覺,可惜雪條帶唔到返嚟香港,做唔到手信,所以只好快啲影完相就食咗佢。

 

7. 珍珠奶茶卷蛋

從側面都可以睇到珍珠就嚟瀉出嚟,蛋糕比想像中濕潤,一般入面都係Cream,但因為今次入面加咗奶茶,所以稍為中和咗Cream嘅飽滯感,而且會散發出陣陣嘅奶茶香味。

由於呢個商品都需要雪,所以只好同朋友一齊喺現場「解決」咗佢,佢同雪條都一樣,雪凍咗嘅珍珠都冇變硬,食起上嚟都仍然有煙韌嘅感覺。

 

8. 珍珠奶茶車輪餅

傳統嘅車輪餅做法最常見就係以紅豆或者係奶油做餡料,最近都有好多舖頭加咗珍珠做餡,睇到呢堆堆成山仔嘅珍珠,就已經令人胃口大開!車輪餅拎上手相當紮實,「爆料」嘅黑糖珍珠配上奶茶醬,出奇地唔會過甜。

一啖咬落去,可以食到成口珍珠同埋濃郁嘅奶茶醬,珍珠食起上嚟都好煙韌,甜度適中,仲帶有淡淡嘅黑糖香氣,趁熱食最好味!

 

介紹咗8種珍珠奶茶嘅特色產品,有啲真係好適合當做台灣嘅手信㗎!強烈推薦大家去台灣都可以逐一試吓!

 

發表於2019.10.23
留言(0)
博客名稱 :
TodyMax
網誌名稱:
TodyMax's blog
使用天數:193
性別:
按月份瀏覽
    2020
  • 一月
  • 二月
  • 三月
  • 四月
    2019
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 飲食烹飪
  • 環球旅遊
  • 生活品味
  • 台灣館
自行分類